रास्वपा सभापति लामिछानेले गरे गृहमन्त्रीको आलोचना

• ४२८
• सोमबार, १६ पौष २०८०

काठमाडौं । राष्ट्रिय स्वतन्त्र पार्टी (रास्वपा)का सभापति रवि लामिछानेले गृहमन्त्रीको चर्को आलोचना गरेका छन् ।

बालकुमारी घटनाबारे छलफल गर्न बोलाइएको राज्य व्यवस्था समितिको बैठकमा पूर्व गृहमन्त्री समेत रहेका लामिछानेले कुनै समय इमानको राजनीति गर्ने नारायणकाजी श्रेष्ठ पदको लोभ गर्ने व्यक्तिमा रुपान्तरित भएको बताए । उनले भने, ‘गृहमन्त्री त्यो नारायणकाजी श्रेष्ठ रहेन, जसले इमानको राजनीति गर्थ्यो । जसको राजनीतिलाई आउने पुस्ताले उदाहरणका रुपमा लिन्थ्यो ।’

गत शुक्रबार भएको बालकुमारी घटना पनि त्यसकै निरन्तरता भएको उनको दाबी छ । विदेशमा गएर केही गर्छु भन्ने दुई युवाको राज्यले हत्या गरेको लामिछानेले बताए ।

गृहमन्त्री श्रेष्ठप्रति आक्रामक रुपमा प्रस्तुत भएका लामिछानेले संविधानको मर्म विपरीत राष्ट्रियसभामा आएको र गृह मन्त्रालयका लागि मरिहत्ते गरेको बताए । आफूप्रति प्रतिशोध राखेको उनको आरोप छ । पत्रिकामा आएको हेडलाइनलाई हेरेर आफ्नो विषयमा छानबिन गर्न समिति बनाएको तर प्रतिवेदन सार्वजनिक नगरेको भन्दै लामिछानेले भने, प्रतिशोध रोग हो, शरीरभित्र नपाल्नुहोला ।’